“Монголын Нууц Товчоон” хэмээх алдарт зохиол нь монголчуудын түүх, хэл, уран зохиол, угсаатны зүй зэрэг олон мэдлэг ухааны гол сурвалж бичиг билээ. “МНТ”-ны анхны эхийг монгол бичгээр, монгол газар нутагт, монгол хүн Их Монгол улсын хааны зарлигаар бичсэн тул түүний үнэ цэн их юм. “МНТ”-ны дундад үеийн монгол хэлний гол дурсгал болохын хувьд монгол хэлний хөгжлийн эртний онцлогийг улируулан судалж, сэргээн тогтооход ховор чухал хэрэглэгдэхүүн болдог. Түүнчлэн, Их Монгол улсын харьяанд байсан бусад улс үндэстний хэлний судалгаа, тэдгээрийн хэлний харилцан нөлөөлөл, тэдгээр улс үндэстний олон талын судалгаанд онцгой тус хэрэгтэй дурсгал юм. “МНТ”-ны хэлийг судлах нь монгол хэл бичгийн судалгаанд чухал төдийгүй Алтай язгуурын хэлнүүдийн судалгаанд ч зайлшгүй үзэж судлах хэрэглэгдэхүүн мөн болно. Энэ хичээлээр эртний болоод дундад үеийн монгол, түүний улирал хувьслыг хэлний төвшингөөр нь судлахдаа, “МНТ”-ны хэлний баримт хэрэглэгдэхүүнд шүтэж хийх болно.